對於全身被汗水包圍的感覺，就像是上世紀的事。要不是被人強拉作伴，我才不會山長水遠來到東涌打羽毛球。
「無練咁多年，睇唔出你仲咁好波喎！」中學時同為校隊的雅亭說。
「你仲好波啦！」我指著她只用毛巾圍著的胸脯。「專登著件長袖喺面，喺正『人哋』面前脫，露晒小背心同事業線。」
「熱吖嘛。」十多年交情，真的心照不宣了。
「知你大波啦！」
「講堅，呢個真係唯一優勢。唔係講笑，呢兩個喺發展商度做高層，荀盤王嚟㗎。」
「咁都唔駛對到正咁『好熱呀！我除件衫先』呀？仲要除完，撥咗兩次頭髮囉。」
「你都得㗎！」
「你真係當阿杰死㗎！」
「佢鬼知咩，騎牛搵馬啦！」
「我哋都好專一㗎！同甘共苦咗咁多年。」
「又係你自己話佢唔好『騎』嘅。」
「殊！」我左顧右盼了一下：「細聲啲啦！呢啲嘢，咁大聲講。」
在我大學Final year時，我跟阿杰在一個朋友的party上的認識。雖然當年很年輕，卻剛剛遇上情傷，終日掛上一張天會塌下來的愁容。說實在的，連自己都覺得討厭。於是，那一晚我借一點醉意就向坐在身邊的阿杰裝熱情。之後，他跟我約會了好幾次後，我們就去了廉價的時鐘酒店。
理所當然地，我們成為了情侶；意想不到地，我們竟然一起了九年。
阿杰比我大幾歲，早就出來工作。雖然學業成績不好，但總算在工業學院學了一技之長，就在工程公司由裝修工人做起。說起來，他如今的收入比不少中環的白領還高。最少，他應該完勝所有我公司三十歲以下，穿上整齊西裝上班的男同事。可是，他的生活習慣及品味，就跟我及身邊的朋友也有很大差別。這沒有高低之分，而是像豪爽的啤酒跟細味的紅酒之差。於是，除了頭兩年還嘗試跟我的朋友混熟外，他逐漸提不起興趣與我一起出席朋友的活動。慢慢地，我也無謂強人所難。
「雅亭，你食咁少嘢嘅？」荀盤一號問。
「打完波食啲咁油膩嘢，我好有罪惡感㗎。」裝什麼！明明她就經常嚷著要食放題。
「難怪你身型咁fit啦！」
唉！男人！明明雅亭的小腹就已經漲得連貼身裙也穿不上，但她卻懂得「上貼下鬆」的穿衣之道，而男人的目光往往只聚焦在她的兩吋事業線範圍。記得她曾說：「就算有料都要識得露。出街的話，一吋唔多覺，兩吋就夠draw attention，自然留意埋旁邊。三吋以上就姣婆格，溝你只係為條『溝』。」
「係呢？你咁瘦，食得少反而對唔住自己喎。」叫Jim的荀盤二號問我。
「我夜少少約咗男朋友食飯嘛。」我無意隱藏我有男朋友的實情。
「咁你一定好易養喇！」我覺得這樣說話有點失禮，誰要女人一定要人養。「要keep 到你咁瘦，應該幾年無咩點食過嘢。哈哈！」
雅亭幾乎表演噴檸茶的絕技，忍俊不禁地說：「係呀！佢真係食好少嘢㗎。」
我有點後悔跟雅亭透露過跟阿杰之間的事。自從阿杰被公司重用之後，雖然收入多了，但卻不時要到澳門或國內監督工作，見面少了之餘，也因為疲倦令熱情減退了不少。這應該不假，因為他近兩年總是一身汗臭味，聽說生活習慣混亂，加上壓力太大會令一個人的汗水分泌變臭。
雅亭也曾問我會否抱怨，我答：「我相信平均成本法，只要不斷增持，唔放棄，最後都會賺嘅。就好似當初同佢一齊果時，佢得幾千蚊一個月，而家收入都唔錯啦！仲會成日送嘢比我添。」
「個個月賺盡唔好咩？」
「你睇你換仔仲快過換床單，咪一樣得個吉。」
「拮得爽就得啦！青春無悔呀！」
「咁我信MPF囉，好未？」
「我都信㗎，man per function 吖嘛。」
「瀨嘢你就知死。」
「安心，我都不知幾安全，BYOB 㗎！」
「BYOB，講得出呢個term就知你中女啦！」
之後，我們一直在餐廳邊說邊吃。坦白說，我也有點餓了，實在難抵枱上食物的誘惑。突然，阿杰傳來一個message 讓我解放了。他說今晚要趕工，未能回港。
「你男友做工程㗎？而家啲大project點都有原因hold 一hold，變相日日趕工，聽講壓力都幾大。咁你哋咪好少見囉」荀盤一號說。
「係。所以我一有時間都會陪佢。」心想你還是繼續盯著雅亭的巨乳吧！別打我主意好了。
「你記得我哋公司個裝修判頭嗎？」他轉頭問Jim：「佢咪就係大壓力過頭，所以搭上咗Vivian囉。」
「唔係掛！果件極品！」Jim不禁嘩然。
「點極品先？」不要少看女人的八卦，特別是雅亭這種自信源於外表的。
「佢極口臭，一開口的話，行過鼻塞都通返。」荀盤一號見雅亭誇張的反應，毫無節制地說：「同呢種女攪嘢，只可以除bra，唔可以除口罩。唔係，邊攪邊嘔都算係另類顏射。」
「好心你哋把口唔好咁衰啦！」我實在有點支持不住說：「發財唔立品，小心財散人安樂呀！」
「知你同男友同撈同煲啦！」雅亭為了緩和氣氛說：「我呢個friend呢，最成功就係短短九年，就湊到個男朋友由廢青變高收入人仕，一直鼓勵佢進修，又體貼，又溫柔。係唔係咁講先？」
「得啦！得啦！」心裡其實我是暗暗認同的。
可是，荀盤一號似乎還沒知進退，把手機遞上來：「俾你哋見識下件極品。」
「旁邊果個……」
我突然嘔吐起來。雅亭一邊掃我背，一邊驚訝地說：
「呢個咪係阿杰！」
人物關係圖：
