「阿杰，我哋返香港先，你留多日睇埋啲手尾啦！」
「咁……知喇 ！老闆。」
「杰，你就正啦！明正言順喺馬交過夜，小心腳軟呀！」
「你估佢係你呀？阿杰出晒名好仔。我就係怕你又亂嚟，要我幫手同你夾口供，先留阿杰喺度咋。」
「挑！有貓唔食魚嘅？！」
聽著老闆及前輩的對話，我只有默默地陪笑。回想十幾年前，我只是一個爛泥扶不上壁的廢青，終日只顧玩樂，女人緣也不缺。表面上，「有一日過一日」是我的生活哲學，內心卻異常懼怕失去存在世上的意義。
可是，有一次卻被女朋友戴上一頂帽子……綠色的。在我想發難時，那個前度卻說：「你同我講承諾呀？你咪又係貪我身材好，扑扑脆。唔同你玩玩下，唔通過人世呀！唔好講我只係十九歲，就算三十歲中女都唔會跟你啦！你連自己都養唔起呀！唔好俾人知我同你上過床添呀，影cheap我呀！」
那一次雖然不是初戀，卻是首次被一個女人傷得如此深；不是因為深愛，而是無還擊之力。僅有的信心被重擊得化成一堆碎片後，整個人就溺斃在被辱罵的回憶汪洋。
直至兩年後，在一個朋友聚會中遇上同樣受情傷的詩穎。她比我年輕，卻聰明及有遠見得多。起初，她以朋友的身份主動向我作出忠告。
「杰，你不如邊工作，邊進修啦！」
「讀呢個course啦！我check過喇，佢哋應該會收你。」
「如果我哋一齊咗，我一心只會對住你。不過，你就要聽晒我話，我唔要互相傷害，好嗎？」
即使我已習慣壓抑自己，卻也希望在飄浮中找到一隻小船，我已沒有拒絕詩穎的餘地。之後，如她所說一樣，我開始更依賴她。
「嗱！而家係時候轉工喇，做呢份啦！前景同收入都可以跳好多。」
「恭喜晒！不過，唔好自滿，要再讀其他course，趁呢幾年建造業好景，要盡快升上去。」
「杰，我哋要計劃吓收入目標喇！我唔係要你養，但我希望我哋日後嘅生活即使比上不足，都比下都要有餘。」
雖然詩穎並不是我老婆，但拍拖九年，我已視她為太太一樣。當然，我也未發達……也許在可見的將來也不會發達。不過，在工業學院畢業的我，能有如今的收入，都是詩穎的功勞。
對！在眾人眼中，我是難得的「好仔」，十分聽話。即使女朋友不在身邊，也自律地不去任何風月場所。要是有人問我原因的話，我大概會答：「怕老婆會發達嘛！」
這不是違心的說話，而是真實地發生在自己身上；我甚至有被拯救的感動……曾經。
我從詩穎的忠告中獲得信心，同時因她指示盡失自信。
原來一顆被擊碎的心，並不一定能被愛情黏合回原狀的。
慢慢地，我懷疑自己只是她心目中的男朋友；並非「我」是她男朋友，而是我演繹了她的「男朋友」。除了工作之外，她連我的日常生活，包括每餐的食物或購買衣服波鞋等，都意見多多。說實在的，她並沒有明令要跟隨。但只要不合她意思的話，一張晦氣的嘴臉總令人不好受。
即使在床上，詩穎也像一個司令一樣。摸這裡、吻那邊、快一點、慢下來……全都聽她的。起初，我倒沒什麼所謂，畢竟男人的最終生理享受還是一洩。
「最近好攰咩？」
「嗯。經常趕工，無計。」
「杰呀，其實你已經升咗好耐。好多時啲嘢要放比下屬跟，唔係下下都落手落腳。知道嗎？」
妳知道我是紅褲子出身的，那些下屬都是我的兄弟，更可能是前輩。難道我眼見他們在趕頭趕命時，我仍坐著指揮，就像妳對我一樣嗎？
「就當我一時技癢，好嗎？」
心裡的說話，始終說不出口，始終是感激，始終是懦弱。而且，我還對她隱藏了一個尷尬的秘密。
試問當我已經擁有一個既年輕，又聰明的女朋友，還能抱怨嗎？我不斷跟已封閉的內心說：因為詩穎的安排，我現在的生活很好：吃得飽，收入增，有前景。以我的天份，即使一世做一個沒主見的木頭人，也要感恩。
我太依賴她，不！我是木頭人。
我快失去自己，不！木頭人根本不會思想。
我是有想法的，不！沒有主人的話，木頭人連動也不會。
內心的矛盾不斷升溫，在快崩潰之際，我遇上了另一個「自己」。她叫Vivian，是上游公司（大判）的一名文職員工。我們總會有開會前碰面，慢慢成為朋友。她的外貌不錯，卻總是很沉默。起初，我並沒有特別在意，直至她有一次問我：「你每次同我傾偈果時，唔覺有問題咩？」
「咩問題？」
「口臭。」
原來Vivian有天生的強烈口臭問題，成為同事間的笑柄。但即使明知一班口賤的同事在取笑她，她也只是陪笑。自卑讓她封閉了情緒，變成了木頭人。
他的同事們當然不會諒解，一班男人在高談闊論時，就更見過份。
「明明就係隱乳代表，點知一開口，真係行過鼻塞都通返。」
「同呢種女攪嘢，一定要戴口罩啦！」
「邊有人會向死神挑戰呀？」
「我覺得無問題喎！佢ok呀！樣靚身材正，又唔係等人養，有咩問題呀？」
可能是同病相憐，我實在忍不住幫口。
「杰哥，睇唔出你都食得好雜喎！」
那一次之後，每次要Vivian的公司開會，我就會被安排坐在她旁邊。後來，我才知道原來我們倆已被其他人「唱」成一對。
「對唔住，我只係一時睇唔過眼，唔知會攪成咁。」
「我知你為人。不過，都要你負責。」
「我有女朋友喎……」
「我知。你下星期咪過澳門跟我哋單嘢埋尾嘅，我咁啱過嗰邊，你請返我食飯啦！」
「咁咋~ 一言為定。」
我跟Vivian是不可能的，因為我的心已習慣依賴詩穎，它才能勉強地仍黏合著。
可是，今天我卻收到一個久違的電話。
「你係唔係同一個口臭嘅女人有嘢呀？」
「與你無關！」
「係咩？不過想話你知，詩穎知道咗囉。」
「佢點會知道㗎？同埋，我哋根本就無嘢。」
「你自己慢慢解釋啦！」
「你到底想點呀？」
「唔想你哋好囉。就是再friend，我唔要㗎，都唔可以比佢隨便攞。」
「雅亭，你痴線㗎！」
人物關係圖：
