advertisement

「朝三暮四」改做「朝四暮三」,㺅子竟然相當滿意。七折脫毛療程改頭換面,重新包裝,叫做「二人同行,一人半價」,不單止令一眾女士覺得吸引,更加令到脫毛療程優惠,憑住 word of mouth 口耳相傳,人頭多了,公司生意上升,老闆亦欣賞我這次聰明的表現。一次老闆見到我,竟然主動問:

「妳就係Selina個助理?」
「係啊!我叫Sheryl。」
「我記得妳,有個大隻男朋友陪見工嗰個吖嘛。」
我心諗,老闆怎會如此好記性?
「妳男朋友又大隻,又靚仔,我先記得啫!」
原來除了好記性外,仲識得聽心聲?她好像看穿我一樣,差點嚇了一跳。
「今次二人同行呢個project,幫公司吸咗唔少新客,以後繼續畀心機做嘢啦。」
「係!知道老闆!」

得到老闆當面稱讚,令我有一陣飄飄然的感覺。不用半日,事情卻變得不簡單。

Lunch 之後,Selina通知我要調去做老闆 assistant。同一時間,我的「表演舞台」messageboard竟突然失效。

she.com 的 IT 專員似乎知道有人在平台上免費賣廣告招生意,開頭只有提到 Adore Beauty 的 post 才被 band,後來只要一提到脫毛、美容,連貼文都貼不到。

真人真事改編:中女輕狂回憶錄(5)自招槍手的無知小鹿

結果,雖然我入職半年就「升職」做老闆 assistant,但卻無法再次立功,老闆固然沒有好臉色,其他同事亦開始閒言閒語。放工後,我總少不免希望Him可安慰一下我。

「Him,我覺得好大壓力,想調返去Selina個部門度。」
「妳傻咗咩!妳有老闆都唔跟,以前阿姐點敢收留番妳呀?」
「唉!如果之前冇轉過去就好啦!」
「妳係咪想唔撈,想做少奶奶?要我養妳,先咁講呀?我唔介意喎。」
「我先唔駛你養我啊!」

我可能心入面覺得「唔可以輸畀啲男人」,每次只要Him有少許暗示我的不足,我就非常反感。是因為港女都愛呈強嗎?我也一度懷疑。後來,我才發現只是心目中的強者,尚未出現而已。

******

在Adore Beauty 返工,我有盡力,但未有突出表現。已經沒有伯樂Selina撐腰的我,日日要應付辦公室政治,於是我心中萌生了兩個念頭,試圖以此消融日積水累而來的危機感。

這兩個念頭就是:進修,跟住搵過份工。

檢討之前到日資公司求職,卻一個interview也沒有,一方面因為SARS,另一方面是因為學歷。冷靜想一想,畢業於日本的三流大學,只有一年工作經驗,就想有國際企業的offer,似乎也太大想頭了。

心動不如行動,直接去讀個master才是當務之急。

我在Adore Beauty的文書工作只是手板眼見功夫,日常多以中文溝通,即使中五畢業也應付有餘。何況我曾於日本留學,就連基本日語也沒什麼問題。看似每天也沒什麼難度,但只要寫一篇功課,竟然覺得難過登天。

「大學、碩士各級功課代筆,中英文皆可,$4,000包A Grade,$3,000包 B Grade,只求合格$5,000,其他另議。」

報了master課程,明知自己讀不上,又不想被Him睇死,我竟然在messageboard只到有「槍手」代做功課。一年才五份功課,這個「請槍」價跟學費比較起來,着實不貴。我找到聯絡人後,便與他於MSN詳談。

「喂,點解包合格收5千蚊,仲貴過拎A呢?係唔係寫多咗個零呀?」
「我任何academic level都係以最top嘅成績畢業。要我寫份僅僅合格嘅paper,我要刻意降低自己嘅智慧水平。呢個價,係補償我嘅心理傷害。」
「OK!咁我就要啱啱合格,畀個冧巴我入數。」
「Seriously? 從來無人要求僅僅合格,妳係第一個。」
「咪咁多廢話,畀埋個e-mail我,我會send入數資料同功課嘅brief畀你,OK?」
「Deal!」
「一言為定。」

功課做得多,找槍手代筆,還是第一次。

這個功課槍手雖然口氣大,但交課倒是相當準時。一知半解的我只是將題目copy and paste 傳送給他,所謂的 briefing 根本未存在過,估不到他果然做到承諾效果:僅僅合格。

除了功課外,返學還要計attendance,真心煩!經常有知名人士被恥笑學位是買回來,到底邊度有得賣?幾多錢先買得到?我都想買一個。

「功課達人!今次又要搵你幫手啊!」
「哦!點呀?」
「今次好急,過埋christmas,即係星期一要,有冇信心?」
「呢個唔係信心問題,係time management問題。做冬唔駛陪屋企人,聖誕dry到要幫妳做功課?」
「咁係接定唔接先?照舊五千,加多五舊當請你食聖誕大餐,OK?」
「Sure,等妳啲料。」

我將資料e-mail給功課達人後,便安心和Him過我們第一個聖誕節。去酒店吃了一個因為節日儀式感,比平時貴一倍的燭光晚餐後,再享受一夜纏綿,完全將交功課的事拋諸腦後。

真人真事改編:中女輕狂回憶錄(5)自招槍手的無知小鹿

兩日後,我才突然想起此事,便發個message給功課達人。

「功課ready 未?」
「What are you talking about?」
「我入咗數畀齊資料你,你而家係咪玩嘢?」功課達人已讀不回,我忍不住續講:「我警告你,我已經有你戶口冧吧。如果你唔將功課交出嚟,我會採取法律行動!」
「好呀!五千蚊嘅私人交易,應該屬於小額錢債處理。我諗由妳提告到收番錢,都起碼要三個月。同埋,let me remind you,妳畀錢搵人做功課,真係可以大條道理告我,而唔怕被disqualify?」

那一刻,我才驚覺自己上了當。除了不能大條道理指他詐騙外,他手上反而擁有我兩次過數的證據。

突然,我想到一隻被馴獸師緊緊捏住的小鹿。或許順應他指示,會大發慈悲,幫我完成我卑微的願望:一份 just pass的功課。

真人真事改編:中女輕狂回憶錄(5)自招槍手的無知小鹿

果然,他知道自己處於操控者的位置。可是,他提出的要求,令我嚇了一跳。

「今晚,我去妳屋企樓下等妳。」
「做咩呀?」
「比多一千現金,一手交錢,一手交貨。」

我立即鬆一口氣,原來他只是想坐地起價。

「我過數畀你咪得囉。」
「仲要請我食餐晚飯,有冇問題?」
「好啦!好啦!總之,我今晚一定要有呢份功課。」
「OK!妳住邊?」
「長沙灣寶麗苑。」
「今晚見。」
「等等,你係男?」
「Don't ask silly questions!」

作為小鹿的我,對槍手一無所知。莫說年齡、身份、就連他的外表,也一無所知。那一刻,我期待的竟不是那份功課,而是享受被神秘人擺佈的刺激感。

真人真事改編:中女輕狂回憶錄(5)自招槍手的無知小鹿

*****

夜晚七點。在我家樓下等待我的,竟是一輛炭灰色的跑車。司機打開車門示意:

「上車!」
「你係槍手?你點知係我呀?」
「好明顯!見到妳,我終於明妳係個表裏一致嘅女仔——僅僅合格。」

我涉手涉腳關上車門後,才驚訝自己的大膽及魯莽。

天色已黑,令我看不清身邊這個人的臉。只感覺到坐在身旁是一個身型高佻瘦削的男人,空氣內濔漫一陣香氣,我分不清到底是車廂的氣味,還是邊身人身上的古龍水味。

槍手果然要對小鹿下手,驅車直向西九龍一間新開張的酒店方向駛去。

(待續)

 

 

 

>>上一集

>>下一集

>>從頭睇