advertisement

寶寶愛移加 楊媽媽

一年一度書展又再舉行,今年書展有個現象,多間書商都推出以移民為主題書籍。其中一位作者就是移民加拿大20多年的楊媽媽。楊媽媽於90年代移民潮,跟隨家人移民加國,在大學時遇到命中註定的楊先生,此後成為加燦乙枚。趁着楊媽媽著作《隨時入籍。寶寶愛移加》於書展推出,小編與她來個書面快問快答,了解楊媽媽的「移加身世」,也讓大家知道這本老華僑編寫的工具書,如何圓滿解答大家對移民加拿大的種種謎思。

 

Q1/楊媽媽為何移民加拿大?

我今年18+22(編按:真實年齡⋯),想當年1992年在沒有選擇(?)的情況下跟父母移民加拿大(投資移民),現育有兩子。嗰時點解要走,應該要問番我阿媽老豆,但係依家「大個咗」(還是老咗?),每年的2月28號(編按:楊媽媽當年移民的「大日子」至今仍然牢牢記住)都會非常感恩他們的決定,因為覺得如果一直留喺香港,可能中學都未必能夠畢業,就真係「我什麼都不是」了。

我甚麼都不是 謝霆鋒

《我什麼都不是》(謝霆鋒 2004)MV截圖

 

Q2/為何決定在加拿大落地生根?

因為遇上了對的人吧?同「過埠新娘」一樣,萬一遇上對方係住喺非洲,都要跟埋去㗎~(笑)

不過認真嗰句,其實碩士畢業時已在加拿大生活超過十年,早已習慣外國生活,根本沒有考慮回流香港。而且成為執業會計師需要一定的加國工作經驗,更加是「唔走得」。雖然也有一齊同屆畢業的同學選擇回港發展,但慣了在加拿大的生活空間和工作態度之後,每次回港也覺得「此處不宜久留」。

 

Q3/近來(今年)是否多人問你移民問題?

非常多,仲越來越多。尤其六月中後,每天都收到不同的留言和短訊查詢。可能我解釋得唔夠清楚,大家以為我真係移民顧問!

 

Q4/作為居住當地20多年的老華僑,你認為多倫多適合/不適合邊類人?

感覺多倫多可能適合比較「宅」,或者比較喜歡戶外活動,懂得自娛,而又比較自立/獨立的人。雖然多倫多已經是比較繁榮的城市,但是如果是天天喜歡出街玩、出街食嘢的話,先剔開使費不計,很快也會投訴「呢度好悶」同「呢度唔係人住㗎」。

 

Q5/什麼年紀職業的人「移加」最着數?

我的facebook《隨時入籍。寶寶 愛移加》成立至三年,幾乎什麼年齡層和行業的人也有接觸過,真的沒有特別年紀職業最吃香,各自找適合的途徑就是了。當然聯邦同各省都有一份「最短缺職業」清單,不過成日都會更新,真係今日唔知聽日事,幾時會「中獎」㗎!

隨時入籍寶寶愛移加

楊媽媽尋日喺網站分享新料,依家有新政策歡迎看護申請移民(facebook截圖)

 

Q6/為什麼寫呢本書?讀者可以期望書中看到什麼?

其實幾年前差不多日日都聽到人問我或身邊朋友想走可點走,更心痛嘅係好多會同我講我什麼都不是、但我真係好想帶小朋友走,問我可以怎樣?

然後咁啱同出版傾呢方面嘅嘢,覺得可能市場有呢個需要,加上我本身好鍾意答問題,就開始鑽研。答下答下,覺得可能呢啲資料可以幫到更多人,喺2016年4月係面書開設咗愛移加嘅專頁開始蒐集資料。三年之後感覺可以掹車邊自封KOL (大笑),加上出版今年年頭睇完報紙,話加拿大是不少人移民的首選,覺得啱時機了,就同出版決定今年出呢一本「孵咗好耐蛋」嘅書啦。

其實到而家,仍然發現好多熱門問題,仍然經常有人在不同平台問,然後每次問問題嗰位所得到嘅回覆都係你一言、我一語咁,再唔係就「被插」做乜唔自己做功課 ⋯⋯我覺得呢班新嚟嘅都好無辜,但又冇可能由頭講起,所以我就用呢個機會將所有「我覺得有用」嘅資訊集成一書,再加上我會計背景嘅加上一點分析,希望可以藉此幫到正在考慮、正在執行、以及剛剛回加的各位。亦希望帶出移民要諗清楚,計清楚,唔係真係話「想走就走」,減低未來後悔嘅機會。

 

楊媽媽小檔案:

寶寶愛移加 楊媽媽

前加拿大海外稅務專員,已婚及育有12歲及8歲兒子。中、大學時代經已熱愛在網絡上遊走,以「老華僑」身份於she.com結識了一班「過埠新娘」,暗地裏已種下了愛答問題的幼苗,至今與這班she友依然友誼長存。現為加國大專院校會計學系教授。著作及個人facebook專頁《隨時入籍。寶寶愛移加》(百寶代指媒(推廣)文化事業有限公司出版),與大家分享移民加拿大最update政策。

 

其他「移民天書」《只想追趕生命裡一分一秒 移民英國解讀101》繆曉彤、黎瑋思合著(商務印書館 2018)

只想追趕生命裡一分一秒

圖片:英倫移民 Janine Miu facebook

這本去年底推出的移民工具書,書寫主角Janice移民英國來龍去脈與心路歷程,亦有英國大律師提供的專業意見,由感性與實用兩大角度為大家提供移民英國的參考資訊。