advertisement

警告

本內容可能含有非she.com需負責任之成人內容,如未滿18歲者,請勿進入。另根據香港政府淫褻及不雅條例,本網頁內容可能令人反感,不可將本網頁之內容派發、傳閱、出售、出租、交給或出借予年齡未滿18歲的人士或將本網頁之內容向該等人士出示、播放及放映。
本人已年滿十八歲
本人未滿十八歲

shelove 情色小說 愛情 柏原太賀 野.火

收工時候,見到 Vincent 離開 office 十分鐘後,我立即落樓跳上 Bella 架車。

 

「開車!」我急促咁講。

「知啦!小姐!」Bella 顯得習以為常。

 

車開走一段路後,我仍不時望住倒後鏡。

 

「點呀?今次條友又咩料呀?」Bella問。

「Miss you much呀!仲話今晚想見面,我估佢一定喺公司樓下等我。」我答。

「嘿!」Bella 一下笑聲中,帶住恥笑嘅意味:「如果佢夠膽殺上妳公司,我都會欣賞下佢。」

「佢已經比大廈保安 black list 咗,上唔到我 office 果層。」

「咁佢都幾痴情吖。」

「痴情同痴漢,只係差一個字咁少㗎咋。」

「咁妳當初又咁衝動?」

「一個人時運低嘅時候,就算唔撞鬼,都好易行差踏錯。」我停一停,再三提醒 Bella:「唔好再提呢條友同我嘅過去,簡直係我人生最大污點。」

 

我同 Bella 口中嗰「條友」叫 Chris。原則上,佢係我前夫。

 

三十一歲果年,因為同前男友分手而獨自旅行散心,途中我認識咗 Chris。不忿嘅感情、中女嘅恐懼、異地嘅浪漫、新鮮嘅瘋癲,同一貫唔理性嘅激情夾攻下,我哋喺當地註冊閃婚。不過,就喺短短嘅回程飛機時間,已經令我悔不當初。

 

我完全忍受唔到一個會令我尷尬嘅男人!

 

佢竟然要求機長開咪,要全機人祝福我哋新婚。空姐代機長拒絕之後,佢就喺機上大吵大鬧,差啲要搵人綁實佢。當我一落機,我已經同佢講會申請婚姻無效。但係,一切都太遲。

 

電話一接通網絡之後,無數 facebook 同 whatsapp 訊息幾乎炸爆我部電話。原來喺上機前,佢已經偷偷地 post 我同佢嘅結婚證書上網,仲 tag 埋我。之後嘅日子先恐怖,喺我四處向親戚朋友解釋發生咩事,同澄清緊只係一時醉酒之過時,佢亦不斷喺 facebook add 晒我嘅朋友,仲怨男上身:「一個人的孤獨晚餐」、「我究竟做錯什麼」、「為何我珍惜的人卻不懂珍惜我」……

 

無數鳴冤,夾雜唔少明眼人一睇就知係假 account 嘅自問自答,將我講成因放唔低舊情而裹足不前嘅可憐蟲,仲要 tag 埋我嘅朋友,叫佢哋幫手勸我同關心我,幾乎已經到達抹黑嘅地步。

 

「我有時都真係幾服咗佢。都幾年啦!竟然仲唔放棄。」Bella 一邊叉起薯條,一邊講。

「佢根本只係無其他女埋身而感情空虛;空虛到唔固執就變相承認自己徹底失敗。」我用力切開碟上嘅輕煎薄牛扒。

「有咩方法可以再狠心啲,令佢對妳死心呢?」

「我都想知呀!但係,都要佢信我狠心先得㗎!佢當晒自己啲 harassment 係關心,仲以為可以感動我放棄舊情呀!

「咁佢都唔知妳之後同過幾多男人一齊。」Bella 裝模作樣咁壓低把聲:「同埋,佢幾天真,妳都知㗎。『妳唔係真心鍾意我,又點會做愛果時嚟咗幾次高潮呀!』」

「Bella Ma,我警告妳唔好再扮佢把死人聲講嘢呀!真係好後悔咩都講晒比妳聽。妳知得太多喇,我會認真考慮滅妳口。」

「係囉!妳唔講,我又點知條友咁天真,真同假都唔識分啫。」

 

雖然我已經多次同 Bella 講過唔想提起 Chris,但係我哋兩個都會不自覺咁講起。或者,人大咗之後,工作已經佔據咗生活嘅九成時間,有趣嘅話題只會買少見少。忽然,電話響起,係 Vincent。

 

「Purple姐,頭先我泊完車之後,有個男人衝過嚟兇我。」Vincent 喺電話講。

「佢無對你做啲咩嗎?你無事嗎?」我問完,見到 Bella 好著緊咁望住我。

「咁又無。不過,佢係咁問我同妳係咩關係。」

「咁你點答?」

「我同佢講呢啲係私隱,同佢無關。我拎起個電話立即錄影,同佢講再唔走,就報警。咁佢就走咗喇。」

「明白。」

「客氣。不過,要唔要幫手?」

「我 ok。今次麻煩晒。」

 

「靚仔 Vincent 無事嗎?」甫一收線,Bella 就立即姣精上身。

「衰在無事。如果 Chris 打佢一身就好啦!」我見 Bella 一臉疑惑,就補充:「如果條友郁手打 Vincent,咁一來可以報警拉佢。二來,亦同時證明佢對我有敵意,同有攻擊性。最少,可以嘗試申請禁制令。」

「妳唔好再衰啲!我以為妳只係想佢幫妳轉移視線啫,原來妳仲想佢畀人打。」

「佢夠膽郁手先講啦!同埋,妳放心都得啦!妳淨係識得睺住人白白淨淨小鮮肉,就梗係唔知佢係空手道黑帶啦!」

「咁正!咪好砌得囉!」Bella捉住我隻手,扮到嬌滴滴咁講:「Purple ~ 妳幾時再帶件小鮮肉出嚟啫?」

「唔好當咗我係扯皮條。上次係咁啱我哋見完客撞到妳咋!」

「車!妳都有妳個歐生啦!」

「唔係我唔要,佢就一定睇得上妳㗎。妳大人哋足足十年呀!中女!」

「而家興姐弟戀呀!特別係靚仔,平時太多後生女埋身,但講到風韻同實戰經驗,邊夠我哋嚟呀!」Bella 用手指勾一勾膊頭嘅 bra 帶,再拋一下媚眼。「妳睇,舉手投足都散發性感。後生仔血氣方剛,彭于晏都頂唔住啦!」

「我覺得妳好似喺森林會食人嘅姥姥呀!哈哈!」

 

我發誓當晚之前,完全無打算同 Vincent 發生工作以外的關係,更加估唔到喺往後嘅悲劇,佢會擔當一個咁重要嘅角色。

 

(待續)

野.火(一)發炮

野.火(二)公司的小鮮肉

 

柏原太賀Facebook:

https://www.facebook.com/Kashiwabara30/